රත්ගමයා ආපසු එයි - "චික්...මොනවද මේ..සුදු පාටට උකුවට ඇග පුරාම"

කාලෙකට පස්සේ මුකුත් ලියන්න බැරි උනා.ලිව්වත් දාන්න බැරි උනා.ඒකට හේතුව උනේ ඉස්සරහා කාමරේ එකාගේ ඩොන්ගල් එක මගේ අතින් නැති වීම.දැන් ඉන්ටර්නෙට් යාම කෙසේ වෙතත් කලිසමක් වත් උගෙන් ඉල්ලනවා බොරු.ඒක නිසා හා හා පුරා කියලා මමත් ගත්තා අලුතෙන් කලිසමක්.කලිසමක් විතරක් අරගෙන්න මදි නිසා ශර්ට් කෑල්ලකුත් ගත්තා.ඩොන්ගලේ නැති උනේ අරූගේ.වාසි උනේ මට.

කොහොම කොහොම හරි පස්සේ දවසේ උදේ පාන්දර සූර්යා ඩොටේ නගිද්දි ඇහැරිච්ච මම අලුත්ම කලිසමයි ශර්ට් එකෙනුයි සැරසිලා හැඩ බැලුවා.

ශා.....මම නිකන් රත්ගමයා වගේමයි.දත් මැද්දේ නැති උනාට මූන හේදුවේ නැති උනාට ඒ ඔක්කොම අඩුපාඩු මග ඇරගන්න පුලුවන් එකම එක සෙන්ට් පාරකින්.වැඩිය හිතෙන්නේ නැතුව මේසේ උඩ තිබුන බොඩි ස්ප්‍රේ එකෙන් ඩිංගක් ඇගට ගහගත්තා.....

ඉකේ...මේ මේ මොනවද මේ...සුදු පාටට උකුවට ඇග පුරාම...

සෙන්ට් එකේ වයර් මාරු වෙලාවත් ද?.ඒ අස්සේ කොහෙන්දෝ හිනා හඩක් ඇහෙනවා..

"හූ හු....ඇද්ද තොට..මගේ ඩොන්ගල් එක නැති කරලා අලුත් ඇදුම් ගත්තට.."

"චික් විතරක් නරක සමනලයා...තෝද මගේ බොඩි ස්ප්‍රේ එක වෙනුවට ශේවින්ග් ක්‍රීම් එක මාරු කරපු සුදු රෙදි හොරා.අනේ තොට කැන්ටිමේ කෑම විස වෙලා බඩ විරේක වෙයන්.."

උගේ ජාතිය අමතලා ඉවර වෙච්ච මම ඇන්ඩ්‍රොයිඩ් මෙව්වා එක තියෙන ෆෝන් එකෙන් අපේ ගෙදරට කෝල් එකක් ගත්තා.ගෙදර කට්ටිය මම නැතුව පාලුවෙන් ඇත්තේ.මගේ හිත ජුංජන් දුකකින් පිරිලා ගියා.
දෙපාරක් විතර නාද උන ෆෝන් එක එහා කොනෙන් ඉස්සුවා..

"හෙලෝ"

ආ....චූටි මල්ලිද කොහේද....

"හෙලෝ..ඕයි මේ මම..."

"මම මම ගාන්නේ..නම කියන්න."

මේ ගෝනි බිල්ලාට මගේ කටහඩත් අමතක වෙලාද කොහෙද.

"ඕයි මේ මම යකෝ.."

"සමාවෙන්න...රෝන්ග් නම්බර්"

"යකෝ..බිබික්කමෝ...තොට ඉදියද ලොකු අයියා කෙනෙක් කැම්පස් එකේ ඉගෙන ගන්න ගියපු."

"ම්ම්ම්ම්ම්ම්....ලොකු අයියා කෙනෙක් නම් ඉදියා වගේ ලාවට මතකයි...ඉතින්"

"ඉතින් නෙමේ බොල..අන්න ඒ ලොකු අයියා තමා කතා කරන්නේ.."

"අපෝ..තෝද...මම ඒත් හිතුවා කෝල් එකක්වත් නැති කොට තෝව සුදු වෑන් එකකින් වත් උස්සලද කියලා.ඉතින් මොකටෙයි ගත්තේ..."

"අම්මට කියපිය මම මේ සතියේ ගෙදර එනවා කියලා."

"හා..මම තියෙනවා මට පන්ති යන්න ඕනා"

එහා කෙලවරින් ෆෝන් එක තිබ්බම ඇහෙන ටීක් ටීක් මෙව්වා එක ඇහුනේ නැති නිසා මම කෝකටත් ෆෝන් එක කනේ තියාගෙනම ඉදියා.

"අම්මේ....."

එහා කෙලවරින් චූටි මල්ලිගේ කට හඩ ඇහෙනවා..ශුවර් එකටම අම්මට පණිවිඩේ කියන්න තමා මූ යන්නේ.කොච්චර උනත් චූටි මල්ලි මට ආදරෙයි.ගෙදර එනවා කිව්ව ගමන් ඉවසිල්ලක් නැතුව ඇත්තේ..

"අම්මේ....අන්න ලොකු එකා මේ සතියේ එනවලු.මම යනවා මගේ ඇදුම් ටික හංගන්න.පොඩි අයියා ආවම එයාටත් කියන්න එයාගේ සෙන්ට් බෝතල්,ඔරලෝසු ටික පේන්නේ නැති තැනක හංගන්න කියලා.මේ සති අන්තේ ඉවරටම ඉවරයි.."

ෆෝන් එක පොලවේ ගහන්න මට හිතුනත් මම එහෙම කරේ නෑ.කොච්චර උනත් ඇන්ඩ්‍රොයිඩ් නේ...

කොහොම කොහොම හරි සතිය ගෙවිලා දන්නේම නැතුව මම ගෙදරටත් ඇවිල්ලා.මහනුවර ඉදලා මාතරටම කෝච්චිය තියෙන නිසා කිසි කරදරයක් නැතුවම ගෙදරට එන්න පුලුවන්.

ගෙදර ආවම ඉතින් මට රජ සැලකිලි තමා.කන්න ලගට ගෙනත් දෙනවා,බොන්න ලගට ගෙනත් දෙනවා..සැලකිලි කෝටියයි.(මම එහෙම හිතන් ඉදියා )

ගියපු පලවෙනි දවසේ පොල්සම්බලුයි බතුයි,ඊට පස්සෙන්දා උදේට කෑම නෑ.ආයේ දවල්ට බතුයි පොල්සම්බලුයි,රෑට පොල් සම්බලුයි පානුයි.

"මොනවද අප්පා මේ කෑම..මේ රටේ තියෙන්නේම පොල් ගස් විතරද?" 

හදවතේ තෙරපුනු වේදනාව වචන වෙලා එලියට පැන්නා.

"නෑ..තොට ඕන නම් තණකොලත් තියෙනවා.ඒත් හැමදාම කන කෑම නේද කියලා අම්මා හදලා නෑ."

ලොකු මල්ලි අමානුශික විහිලු කරනවා..මූ දැන් කොලොප්පන් කරන්න ටියුශන් ක්ලාස් එකකට වත් යනවද මන්දා..මීට වඩා හොදයි කැන්ටිමේ තියෙන කෑම ටික කාගෙන කැම්පස් එකට වෙලා කෙල්ලෙක් එක්ක කිරි හලට ගිහින් කුක්කු ටිකක් බිව්ව නම්.ඔක්කොම හරි ඒත් කෝ කෙල්ලෙක්..? කොහේද අපේ අම්මලට කිසිම ඕන කමක් නෑ නේ මේ ගැන.
නෑ මම අහන්නේ..මම දැන් ලොකු ලමයෙක් නේද? හ..
අපි නිකන් ගෙදට්ට නාකි වෙනවා.අපේ වයසේ කෙල්ලෝ කසාද බැදලා දරුවොත් අපිට මාමේ කියනවා.මේක මහා කුරිරු ලෝකයක්.
මේ හිතට දැනුන වේදනාව තුනී කරගන්නත් එක්ක මම බොන්න හිතුවා.සෑහෙන කාලෙකින් හොද ශොට් එකක් දාන්න බැරි උනා.

"චූටී.....චූටි මල්ලෝ....කොහේද මේ හොර ගෙඩියා.."

හැමදේටම කඩේ යවන්න ඉන්නේ මූ නිසා මම සද්දෙට ඌට කතා කරා..

"මොකෝ තොට වෙලා තියෙන්නේ අද.මොනවද ගේන්න ඕන"

"මට බොන්න නෙක්ටෝ එකක්"

"එහෙම කඩේ ගිය කාලේ ඉවරයි අයියේ..ඕනම නම් මට පගාවක් දෙන්න වෙනවා"

"චික්..මූත් ස්වර්නවාහිනියේ නිව්ස් බලලද කොහේද මහා අවලම් වෙලා.තව ටික දවසකින් මට පිහියෙන් ඇනලා හරි ගගේ ගිල්ලවලා හරි මූත් යනවා ඔය අසූචි වාහිනියේ නිවුස් වලට..

"මම කියලා තියෙනවා නේ උඹට රෑ අටට ඕක බලන්න එපා කියලා.ඒක වැඩිහිටියන්ට පමනයි වැඩසටහනක්."

"මම බලන්නේ දගර වලිග ලප වානර විතරයි. හ.. පගාව කිව්වේ සල්ලි නෙමේ යකෝ..අද හවස මාව එක්ක යන්න ක්ලාස් එක ගාවට වර..හැබැයි කාර් එකේ එන්න ඕන."

හෑ...යකෝ මූ ගිය උඩක්..ශුවර් එකට කවුරු හරි කෙල්ලෙක්ට පේන්න තමා මූ මේ එන්න කියන්නේ.ඒත් කමක් නෑ..මූට හරි යනවා කියන්නේ මට හරි යනවා වගේ තමා නේ.

"හරි එන්නම්.දැන් නෙක්ටෝ එක ගෙනෙන්.මට දිව රතු වෙන්න බොන්න ඕනා"

ඌව කඩේ යවලා නෙක්ටෝ එක ගෙන්න ගත්තු මම ඇදට වෙලා ඇලට් එකක් දැම්මා.

ලාවට නින්ද යාගෙන එනකොටම වෙච්ච කුජීත  දේ..ඒ වගේම චූටි මල්ලිත් එක්ක පන්ති ගිහින් එනකොට පොලීසියේ රාලහාමිට අහුවෙලා උන දේවල් වගේ මහා භයානක ඇග කිලිපොලා යන ලිංගික දර්ශන සහිත කොටස් වලින් පිරිච්ච් දෙවන කොටසින් ලගදීම හමුවෙමු...